தரம் 5 புலமைப்பரிசில் மற்றும் க.பொ.த உயர்தர பரீட்சைகள் நடைபெறவிருக்கும் திகதிகளில் மழை பெய்தால், பாதிப்புகளைக் கண்காணித்து உரிய நடவடிக்கைகளை முன்னெடுக்க ஒரு சிறப்புப் பிரிவு அமைக்கப்படும் என்று பேரிடர் மேலாண்மை மையம் அறிவித்துள்ளது.
தற்போது நிலவும் மோசமான வானிலையை கருத்திற்கொண்டு நடைபெறவுள்ள புலமைப்பரிசில் மற்றும் உயர்தர பரீட்சைகளை (GCE A/L) நடத்துவது தொடர்பாக இன்று (05) ஒரு சிறப்புக் கலந்துரையாடல் இடம்பெற்றது.
வானிலை ஆய்வுத் திணைக்களம், பேரிடர் மேலாண்மை மையம் (DMC) மற்றும் பரீட்சைகள் திணைக்களம் ஆகியவற்றின் பிரதிநிதிகள் இந்த கலந்துரையாடலில் பங்கேற்றனர்.
இதன்போது, எதிர்வரும் நாட்களில் மோசமான வானிலை நிலவினாலும், பரீட்சைகள் தடையின்றி நடைபெறுவதை உறுதி செய்வதற்கான நடவடிக்கைகள் குறித்து கூட்டத்தின் போது கலந்துரையாடப்பட்டுள்ளது.
அதற்கமைய, ஒகஸ்ட் 6, 7 மற்றும் 8 ஆகிய திகதிகளில் மழை பெய்தால், பரீட்சை நடவடிக்கைகளில் ஏற்படக்கூடிய பாதிப்புகளைக் கண்காணித்து, அதற்கு பதிலளிக்கும் வகையில் தனது செயல்பாட்டு அறையில் ஒரு சிறப்புப் பிரிவு அமைக்கப்படும் என்று பேரிடர் மேலாண்மை மையம் அறிவித்துள்ளது.
வெள்ளப்பெருக்கு ஏற்படும் பட்சத்தில் உதவி வழங்குவதற்காக, படகுகளும் பேரிடர் மீட்புக் குழுக்களும் தயார் நிலையில் வைக்கப்பட்டுள்ளதாகவும் தெரிவித்துள்ளது.
2026ஆம் ஆண்டுக்கான ஐந்தாம் வகுப்பு புலமைப்பரிசில் பரீட்சை, ஒகஸ்ட் 9ஆம் திகதி நாடு முழுவதும் உள்ள 2,723 பரீட்சை மையங்களில் நடைபெற உள்ளது.
அதேநேரம், 2026ஆம் ஆண்டுக்கான க.பொ.த உயர்தர பரீட்சை, ஒகஸ்ட் 10 முதல் செப்டெம்பர் 5ஆம் திகதி வரை 2,532 பரீட்சை மையங்களில் நடைபெறவுள்ளமை குறிப்பிடத்தக்கது.
