முன்னாள் ஜனாதிபதி மைத்திரிபால சிறிசேன, ஞானசார தேரருக்கு வழங்கிய பொதுமன்னிப்பில் ஏதேனும் விதிமுறைகள் ரீதியான குறைபாடுகள் இருப்பின் அதனைத் திருத்துவதற்கு ஜனாதிபதி அநுரகுமார திஸாநாயக்கவுக்கு அனைத்து அதிகாரமும் உள்ளது என்று பொதுஜன பெரமுனவின் நாடாளுமன்ற உறுப்பினர் சானக மாதுகொட தெரிவித்துள்ளார்.
மேலும், மைத்திரியால் விடப்பட்ட விதிமுறை தவறுகளைத் திருத்தி, மீண்டும் ஞானசார தேரருக்கு ஜனாதிபதி அநுரகுமாரவால் பொதுமன்னிப்பு வழங்க முடியும் எனவும் அவர் சுட்டிக்காட்டினார்.
ஊடகவியலாளர் சந்திப்பொன்றின்போதே அவர் மேற்கண்டவாறு குறிப்பிட்டார்.
தொடர்ந்தும் தெரிவிக்கையில்,
மக்கள் விடுதலை முன்னணியினரிடம் வரலாற்று ரீதியாகவே பௌத்த எதிர்ப்புக் கருத்தில் ஒன்று இருந்து வந்துள்ளது.
அவர்கள் தற்போது ஆட்சிக்கு வந்துள்ள நிலையில், அந்தச் சிந்தனையையே நாட்டுக்கு வெளிப்படுத்திக் கொண்டிருக்கின்றார்கள்.
கலகொடஅத்தே ஞானசார தேரர் தொடர்பான விவகாரத்திலும் நாம் இதனைக் காணக்கூடியதாக உள்ளது.
முன்னாள் ஜனாதிபதி மைத்திரிபால சிறிசேனவினால் வழங்கப்பட்ட பொதுமன்னிப்பில் ஏதேனும் விதிமுறைகள் அல்லது குறைபாடுகள் இருப்பின், அவற்றை நீக்கி ஞானசார தேரருக்கு மீண்டும் மன்னிப்பு வழங்க முடியும்.
அந்தத் தவறைச் சரிசெய்வதற்கான முழுமையான அதிகாரம் ஜனாதிபதிக்கு உள்ளது என குறிப்பிட்டுள்ளார்.
