
மட்டக்களப்பு- மயிலத்தமடு, மாதவனை மேய்ச்சல் பண்ணையாளர்களுக்கு நீதி கோரியும், நீதிமன்ற தீர்ப்பினை நடைமுறைப்படுத்தக் கோரியும் போராட்டமொன்று முன்னெக்கப்பட்டுள்ளது.
இதன்போது போராட்டக்காரர்கள் தமது கண்டனத்தை வெளிப்படுத்தி மட்டக்களப்பு பிரதேச செயலகத்தை முற்றுகையிட்டு தமது போராட்டத்தை ஆரம்பித்துள்ளனர்.
இந்தப் போராட்டத்தில் நாடாளுமன்ற உறுப்பினர்களான சிறிநேசன், சிறிநாத் மற்றும் வேலன் சுவாமிகள் ஐபிசி தமிழ் குழுமத்தின் தலைவர் கந்தையா பாஸ்கரன், முன்னாள் நாடாளுமன்ற உறுப்பினர் செல்வராசா கஜேந்திரன் மற்றும் பண்ணையாளர்கள் என ஆயிரக்கணக்கானோர் கலந்து கொண்டுள்ளனர்.
அத்தோடு, மக்களின் கோரிக்கைக்கு தீர்வு தர வேண்டும், பண்ணையாளர்களின் வாழ்வாதாரத்தை அழிக்காதே, வேண்டும் வேண்டும் நீதி வேண்டும், அபிவிருத்தி குழுவின் தீர்மானங்களை நடைமுறைப்படுத்து, மேய்ச்சல் தரை நிலம் எமக்கு வேண்டும், சட்டவிரோத குடியேற்றவாசிகளை வெளியேற்று, மகாவலியே வெளியேறு என்ற கோசத்தை எழுப்பி போராட்டத்தில் கலந்து கொண்டவர்கள் தமது ஆதங்கத்தை வெளிப்படுத்தி உள்ளனர்.
சட்டவிரோதமாக மட்டக்களப்பு மயிலத்தமடு மற்றும் மாதவனையில் குடியேறியவர்களால் பண்ணையாளர்களும், பசுக்களும் தொடர் அச்சுறுத்தலுக்கு உள்ளாகி வருகின்றமை குறிப்பிடத்தக்கது.
மயிலத்தமடு- மாதவனை பண்ணையாளர்களுக்கான சரியான நீதியை தற்போதைய அரசாங்கமும், பொலிஸாரும் நிலைநாட்ட வேண்டும் என போராட்டத்தில் கலந்து கொண்டவர்கள் கருத்து தெரிவித்தனர்.
அத்தோடு, பொலன்நறுவையில் உள்ள விவசாயிசாயிகளுக்க மட்டக்களப்பிலே காணிகளைக் கொடுக்காமல் அவர்களினுடைய பிரதேசத்திலே காணிகளைக் கொடுக்குமாறும் கோரிக்கை விடுக்கப்பட்டது.
மேலும், அண்மையில், பண்ணையாளர் ஒருவரின் மாடு துப்பாக்கிச் சூட்டுக்கு உள்ளானமை குறித்து உடனடியாக விசாரிக்கப்பட்டு நீதி நிலைநாட்டப்பட வேண்டும் எனவும் போராட்டக்காரர்கள் வலியுறுத்தியுள்ளனர்.
